Սաների ընդունելությունը կազմակերպվում է 08.45-09.30։ Դաստիարակներից մեկը 8:45 լինում է խմբասենյակում, օդափոխում խմբասենյակը: Բուժքույրը ջերմաչափում և տվյալները լրացնում ջերմաչափման էլ.մատյանում: Երեխայի բացակայության կամ ուշացման, ինչպես նաև դրանց պատճառների մասին ծնողը դաստիարակներին տեղյակ է պահում մինչև 09։30: Հենց տնից-նախակրթարան ճանապարհից էլ սկսում է նրանց ուսումնական գործունեությունը: Սաներն ինքնուրույն են զգեստափոխվում: Դասավորում են աթոռները, մաքրում փոշիները, խնամում են բույսերը, ջրում և փխրեցնում են հողը: Բակում հավաքում են թափթփված աղբը։
- 9:30-10:00-Ռոդարիական ուրախ մարմնամարզությանը միանում են կոմիտասյան երգն ու պարը: Դաստիարակը սանի հետ պետք է մագլցի, վազի, թռչի բարձրությունից, չոչ անի, գլուխկոնծի տա և այլն՝ խենթություներով լինելով անմիջական մասնակիցը կրթության, լինելով սաներից մեկը, ոգևորելով, երևակայելով…:
Սաները հաճախ իրենք են շարժումները որոշում: Երբեմն մարմնամարզության ընթացքում կենդանիներ են դառնում, շարժումային տարբեր փոքրիկ ներկայացումներ են ստացվում, երբեմն ամբողջ վարժանքը պարի է վերածվում: Խաղաստեղծ միջավայր կարող է լինել նաև մեր մարմինը: Երբ նրան ավելացնենք «լույս + ստվեր= ստվերախաղբաղադրատոմսը», կստացվի իմացումի հերթական, իսկական հրճվանք: Ինչքան ուզում ես թափահարի՛ր ոտքերդ, ձեռքերդ, մարմինդ, մազերդ, ստվերային ներկայացումներ խաղա՛, իրական ազատությունը զգա՛…:
- 10:30—Նախաճաշ
- 11:00-12:00— Գարնանային պարտեզ` ամենօրյա զբոսանք մաքուր օդում 30 րոպե, օրվա գործունեություն
- 12:30—Ճաշ
- 13:00-15:00- Քուն (Աստղափայլ օրորներ):
- 15:30- Հետճաշիկ:
- 16:00— 16:45— Զբոսանք մաքուր օդում, ազատ գործունեություն, տուն ճանապարհում
Ապրիլ ամսվա օրացույց
- Մարտի 1-ապրիլի 10` «Ձոն մայրիկի» ստուգատես- ցուցահանդես
- Մարտ 1-ապրիլի 28` «Աղայան+ Ռոդարի» ստուգատես
- Ապրիլի 2` Ծաղկազարդ-ծառզարդարը կրթական պարտեզում.
- Ապրիլի 9` Սուրբ Հարության տոն
Ապրիլ ամսվա սեմինարներ
- Ապրիլի-3, 7, 10, 14, 17, 21, 24, 28-ի պարապմունքներ. պարուսուցում, երգուսուցում (Լաերտ Գրիգորյան, Մարինե Ոսկանյան)
- Ապրիլի— 6. 13, 20, 27-ի պարապմունքներ. հեծանվավարություն (….)
03.04֊07.04
Այս տարի Զատիկը նշվում է ամսի 9֊ին։ Հետևաբար զատիկին նախորդող յուրաքանչյուր շաբաթ ունի իրեն բնորոշ օրն ու խորհուրդը` ըստ առաքելական եկեղեցու
- Երկուշաբթի`Ջրաղացպանի օր: «Խնոցի-հարոցի» խաղը։ Քոլեջի ներքին բակում խաղում ենք ազգային խաղ՝ Հարի՛, հարի՛, խնոցի՛,
Մեջդ բարի, խնոցի՛,
Ունկըդ բարակ, խնոցի՛,
Մեջըդ կարագ, խնոցի՛։ - Երեքշաբթի`Խաղում են «Հիմար-իմաստունի» վիճակի արարողություն
- Չորեքշաբթի չիք-օր է: Այդ օրը հիմնովին մաքրում են խմբասենյակը, բակը, շրջապատը` աղբը չիք են անում:«Չիք-չիք» են խաղում: Յուրաքանչյուրը երկու քար է վերցնում: Դրանք քսում են իրար և ասում._Չիք-չիք, մուկը չիք,_Չիք-չիք, մոծակը չիք…Կարելի է խաղալ հարցուպատասխանովՄի խումբ. _Չիք-չիք, ի՞նչը չիք:Մյուս խումբ. _Չիք-չիք, կռիվը չիք:Մի խումբ. _Չիք-չիք, ի՞նչը չիք:Մյուս խումբ. _Չիք-չիք, հիվանդությունը չիք:Մի խումբ. _Չիք-չիք, ի՞նչը չիք:Մյուս խումբ. _Չիք-չիք, կռիվը չիք:
- Հինգշաբթի: Այդ օրը այգեպանները, վերցնելով կացինը, այգի են մտել և վատ բերք տվող ծառերի բնին կացնի բութ կողմով հարվածելով` վախեցրել. «Բերք ես տալու, տուր, թե չէ` կկտրեմ»:
- Ուրբաթ: Մանկական խոհանոցում բոլորը միասին զատկական կերակուրներ են պատրաստում, Զատկի ձվերն են ներկում
- Տեխնոլոգիական աշխատանք թելերի օգնությամբ
- Խոհանոցը սաների ամենահամեղ վայրն է, պատրաստելու ենք համեղ թխվածքաբլիթներ
- Քոլեջի ներքին բակում միասնական նշում ենք ծառզարդարի ծեսը
10.04֊14.04
- Տեխնոլոգիական աշխատանք թելերի օգնությամբ
- Խոհանոցը սաների ամենահամեղ վայրն է, պատրաստելու ենք համեղ թխվածքաբլիթներ
- Խաղում ենք հավես ձվախաղեր
- Բլբլան ռադիո֊սաները բլբլում են զատկի մասին, ինչ գիտեն, ինչ են անում…..
- Ռոդարիական հավես խաղերի շարք Քոլեջ պարտեզի ներքին բակում
17.04֊21.04
- Շարունակում ենք Ռոդարի+ Աղայան շարքը
- Կպատրաստենք ինքնաշեն խաղեր
- Քոլեջ պարտեզի բակում կկատարեն այլընտրանքային նկարչություն
- Կմարզվենք, կխաղանք մարզախաղեր
24.04֊ 28.04
- Ազգային, բակային խաղերի հավես շարք
- Կպատրաստենք ինքնաշեն ծեփամածիկ
- Կաշխատենք կավով
Ամսվա երգերը`
Բարի լույսի զանգեր զարկին,
Զնգզնգալեն անուշ-անուշ,
Լույսը բացվեց մեր աշխարհքին:
Ճղճղալեն անուշ-անուշ:
Զատկական ասիկներ՝
- Դռան առաջ հերկեցինք, Զատկի ձվեր ներկեցինք, Դրկցին ողջույն տվեցինք:
- Լուսնյակն անուշ, հովն անուշ, Հում կաթի պաղ սերն անուշ:
- Մարիամ խաթուն, Մարիամ խաթուն,
Իջի մեր տուն, իջի մեր տուն,
Ես քեզ կտամ նուշի կթուն:
Զատիկ, զատիկ, նավակատիկ, արի նստի մեր տան մոտիկ:
- Ունեցողի համար ամեն օր Զատիկ է:
- Կուշտ ուտելը Զատկի իրիկունն է:
- Կարմիր ձուն Զատկին կսազե:
- Կարմիր ձու տուր, կարմիր օր տամ:
- Զատիկը առանց ձվի չի լինի:
- Զատկից հետո կարմիր հավկիթ:
- Զակտե Զատիկ է՜, նավակատիկ է՜, չամչի հատիկ է՜:
- Զատիկն ասել ա՝ հենց գամ արմանաս, հենց գնամ՝ զարմանաս:
Անի Մարտիրոսյան 